LAOAG CITY – Adalen ti Sangguniang Bayan iti ili ti San Nicolas no kasapulan ti pannakaited ti amnesty kadagiti nailako a prangkisa ti tricycle.
Segun iti Bise Mayor, no ania ti irekomendar dagiti miembro ti Sangguniang Bayan ket isu ti pagsasaritaanda gapu ta iti agdama nga administrasion ket saanda pay a nangted ti amnestiya.
Inbatadna nga uray adda dagiti report mainaig iti pannakailako ti sabali ti prangkisa ngem dagitoy ket dagiti laeng pimmusay a franchisee nga awan ti sabali a pakaipasaanna ket masapul a mapagnunumoanda a naimbag.
Mainaig iti daytoy, nagballaag ti Bise Mayor kadagiti addaan ti prangkisa mainaig iti panagilako gapu ta saan a mabalin a mailako daytoy a prangkisa.
Kabayatanna, naammoan nga adda ti 1,600 a tricycle franchisee iti nasao nga ili ken iti agdama ket awan pay ti available nga slot.
