LAOAG CITY – Nakaaramid ti baro a rekord iti intero a lubong ti sculpture ti higante a dragon a naaramid iti 38 a ribu a balloon a naiparang iti maysa a shopping mall idiay Hong Kong.
Pinasingkedan ti Guinness World Records a dagiti balloon artists a da Sze Tai Pang ken Kun Lung Ho ti kaudian a nakaiggem iti titulo a “Largest Balloon Sculpture of a Dragon.”
Inaramid da Pang ken Ho ti sculpture ti dragon balloon nga agrukod iti 137.04 a pie. Kadua dagiti dua a balloon artist ti 60 a boluntario a timmulong a nangurnos iti pie.
Dagiti boluntario ket estudiante iti kolehio ken estudiante iti haiskul manipud iti nagdumaduma nga unibersidad ken sekondaria iti Hong Kong.
Segun kada Pang ken Ho, ti karit kadakuada ket ti panangaramidda iti sculpture a saanda nga agusar iti base wenno supporting frame. Ti intero nga sculpture ket naaramid nga interamente kadagiti balloon.
Naipabuya ti sculpture ti dragon iti shopping mall tapno mangipaay ti ragsak ken liwliwa kadagiti tattao.
