LAOAG CITY – Kinumpirmaran ni Police Capt. Edwardo Santos, ti chief of police iti ili a Pagudpud a positibo dagiti insayangkat da a search operations iti Barangay Balaoi ken Barangay Pasaleng ti nasao nga ili.
Binigbig na ti subject ti operasyon iti Barangay Balaoi a ni Rey Bongbong Corales, agtawen iti 43, naasawaan, mangngalap idinto a ti subject ti operasyon iti Barangay Pasaleng ket ni Edgardo Ocampo, dati a Range officer ti Hannah’s Beach resort ti met laeng nasao nga ili.
Inbatad ni Santos a naala iti balay ni Corales iti innem a bala ti kalibre 45 a paltog ken uppat a bala ti cal. 38, ngem awan ti naala da a paltog a naipalaon ti search warrant.
Segun kenkuana, adda dagiti dumandanon kadakuada nga impormasyon a ni Corales ket agiyus-uswat ti illegal a panagkalap wenno ti panagbungbong.
Kabayatanna, naala met iti balay ni Ocampo ti nakaad-ado a bala ti nagduduma ti kalibre na a paltog ken adda pay ti reloader na.
Innayon ni Santos nga adda pay ti rekord ni Ocampo mainaig ti kaadda dagiti nakarirriri na iti kallabes.
Mainaig ti daytoy, kuna ni Santos a saan nga isuda ti nagaplikar ti search warrant no di ket mismo a ti kampo.
