LAOAG CITY – Insayangkat dagiti kameng ti PNP-Bangui a search warrant operation iti Barangay Dadaor iti nasao nga ili.
Inbatad ni Police Captain Julius Basallo, ti chief of police ti PNP-Bangui a ti nakalanad iti search warrant a biruken da ti kalibre 45 a paltog.
Nupay kasta, ti naala iti operasyon ti maysa a bala ti caliber 38 a paltog, maysa a pidaso ti by pat wenno ti pagtakderan ti long fire arms.
Inlawlawag na nga uray maysa laeng a bala ti naala da iti pagtaengan ti subject ket naglabsing latta iti RA 10591 ken mapilaan latta ti kaso ken agdependar iti piskalya iti desisyon.
Kunana a nagaplikar da ti search warrant gapo kadagiti report a no mabartek ket maipagarop agprobokar.
Mainaig iti daytoy, kuna ti hepe nga inpetteng ti subject a pellet gun ti us-usaren na nupay inadmitir na nga agkarkaryar kadagiti kainuman na, ken ti bala ket an-anib da laeng.
