LAOAG CITY – Agtultuloy ti imbestigasyon dagiti pannakabagi ti linteg iti ili ti Badoc kalpasan a napaltogan ti maysa a security guard a poon ti dagus a nakatayan na iti Brgy. Sta Cruz iti nasao nga ili.
Nabigbig ti biktima a ni Sherwin Dumadag y Binggayen, agtawen ti 23, naasawaan, ken residente iti Brgy. Aring iti ili ti Badoc.
Iti inisyal nga imbestigasyon, iyur-uray ti biktima ti pagluganan na nga armored vehicle iti sango ti waiting shed ti Rural Health Unit iti Brgy. Sta. Cruz idi ta dimteng dagiti suspek a nakalugan ti maysa a motorsiklo ken pinaltogan da ti biktima iti sumagmamano a daras.
Dagus a nagtalimpuagaw dagiti suspek iti saan a naamuan a direksiyon.
Nagsagaba ti biktima iti tama ti bala iti barukong na.
Narekobre met dagiti otoridad dagiti dua a pidaso ti kapsula ken maysa a buli ti kalibre 45 a paltog.
