LAOAG CITY – Manamnama a sumango iti panagdengngeg da Ombudsman Jesus Crispin Remulla, dati a Senador Antonio Trillanes IV, opisial ti Anti-Money Laundering Council ken dadduma pay a karaman iti lima a resource persons nga inimbitaran ti House Committee on Justice nga agatendar iti agtultuloy a panangtingiting iti impeachment complaint kontra ken ni Vice President Sara Duterte inton bigat, Abril 22.
Inbatad ni Justice panel Chairperson ken Batangas 2nd District Rep. Gerville Luistro, dagiti nasao a resource persons ti makatulong tapno mailawlawag ti alegasion mainaig iti kellaat a panagadu ti baknang ni Vice President Duterte, saan a panangdakamat ti pudno nga Statements of Assets, Liabilities and Net Worth (SALN) a mailabsing iti artikulo ti ‘betrayal of public trust’ iti impeachment complaint.
Agtestigo ni Remulla iti kopya ti Statements of Assets, Liabilities and Net Worth ni Vice President Sara manipud 2022-2025, 2007-2013 ken 2016-2022.
Mangipaay met ti testimonia ni Trillanes iti panagadu ti baknang ni Vice President Duterte. Ti dati a senador ti nangakusar ken ni Vice President Sara ken ti amana a ni dati a Presidente Rodrigo Duterte a maipagarup nga addaanda ti nakalemmeng a baknang.
Karaman kadagiti pinaayaban ti panel ni Overall Deputy Ombudsman Melchor Carandang a nasuspenso kalpasan nga inparuk-atna ti bank documents ni Vice President Sara iti Anti-Money Laundering Council.
Inimbitaran pay ti komite dagiti opisial ti Anti-Money Laundering Council tapno ipakita ti mapagat-atapan a transaksion iti bangko ni Vice President Sara ken ti mister daytoy a ni Atty. Manases Carpio.
Manamnama ti panagatendar ti opisial ti Bureau of Internal Revenue (BIR) tapno agtestigo met iti income tax returns ni Vice President Duterte ken ti asawana.
Inpetteng pay ni Luistro nga agserbi a pokus ti klaripikasion iti panagdengngeg a maammoan ti ‘probable cause’ tapno umuli ti kaso.
