LAOAG CITY – Nagpanawagan ni Senador Alan Peter Cayetano para iti maysa a komprehensibo ken aggigiddan a diskusion maipanggep iti legalisasion ti divorce, annulment ken panangpapigsa ti panagkadua ti agasawa tapno maipasigurado ti balanse a panangsolbar kadagiti marital challenges iti pagilian.
Inpetteng ni Cayetano ti kinapateg ti pamilia kas pundasion ti pagilian.
Binigbig ti agpanpanday linteg ti realidad ti “impossible marriages” no sadino ti panangabuso wenno dadduma pay a saan a masolbar nga isyu ket mangitunda ti saan a nainkalintegan nga agtultuloy a panagdennada.
Nupay kasta, inpalgakna a saan a mabalin nga agsina a talantanen ti divorce gapu ta adda met ti maipanggep iti annulment ken ti panangpapigsa iti panagkadauda dagiti agasawa.
Inrakurak ni Cayetano ti namnama a magun-od ti maysa a katulagan kadagiti isyu ken makabiruk ti epektibo a solusion.
