LAOAG CITY – Arig napukawanen ti namnama ni Senador Ronald “Bato” dela Rosa a magun-odna pay ti patas nga hustisia iti babaen ti administrasion Marcos.
Inbatad ni Dela Rosa iti nakitana a panangtrato dagiti otoridad ken ni dati a Presidente Rodrigo Duterte ket saanen mangnamnama daytoy nga adda pay ti makitana nga hustisia.
Inlawlawagna iti agbaliw-baliw nga istratehiana mainaig iti posibilidad a maarestar ti International Criminal Court (ICC).
Inbatad ti agpanpanday linteg a nagbaliwen ti takderna ken ni Presidente Ferdinand Marcos Jr. a naminsanna daytoy a binagaan idi nga uray ti buokna ket saan a maiggaman ti International Criminal Court ngem ita ket binaybay-anna a maarestar ni dati a Presidente Duterte iti International Criminal Court ken saanna a maliklikan a posible nga isuna ti sumaruno.
Inpetteng ti Senador, no ni Presidente Marcos ket nagbaliw ti takderna ket kasapulanna met ti agbalin a flexible ken madiskarte nangruna ita a gundaway.
Innayon pay ni Dela Rosa a depende iti situasion no matiliw wenno agpatiliw isuna ken ad-adalenna pay laeng dagiti opsyon iti kanito nga arestaren isuna sa ti International Criminal Court.
