LAOAG CITY – Nakairekord ti kaadoan nga absent ita a first regular session ti 20th Congress ni Senador Ronald “Bato” dela Rosa.
Basar iti official attendance record ti Senado, saan a simrek ni Dela Rosa iti 31 manipud iti 58 a session days a nangrugi idi Hulio 28, 2025 agingga idi nag-adjourned para iti legislative break idi Marso 18.
Ni Dela Rosa ket saanen a nagpakita iti Senado sipud idi inanunsio ni Ombudsman Jesus Crispin Remulla idi umuna a lawas ti Nobiembre nga addaan ti warrant of arrest ti International Criminal Court (ICC) kontra iti senador.
Kabayatanna, simmaruno met nga addaan ti kaadoan nga aldaw nga awan iti trabaho ni Senador Camille Villar a nakairekord ti 16 absences gapu ta nagpasngay ken naka-maternity leave.
Simmaruno ni Senador Alan Peter Cayetano a nakairekord ti 14 nga absent malaksid pay ti 24 a daras a late iti plenary sessions.
Naka-perfect attendance met da Senate President Tito Sotto, Senate Majority Leader Migz Zubiri, Senators Sherwin Gatchalian, Risa Hontiveros, Bam Aquino, Jinggoy Estrada, Bong Go, Imee Marcos, Rodante Marcoleta, Robin Padilla ken Joel Villanueva.
