LAOAG CITY – Inbatad ni Senador Imee Marcos nga uray maikkat ti Enhanced Community Quarantine (ECQ) intono Abril 30 ken mamati a partial laeng ti aglukat.
Inyarig na ti transportasyon a basar iti DOTr ket no maikkat ti ECQ ket 30 a porsiento pay laeng ti agoperar.
Segun iti senadora, ti ibagbaga dagiti dodoktor ket masapol a maisayangkat nga umuna ti mass testing tapno maamoan no siasinno dagiti addaan ti sakit a covid-19.
Nupay kasta, kuna ni Marcos a saan pay a dimteng dagiti testing kits ditoy pagilyan.
Innayon ni Senador Marcos a pabor dagiti dodoktor a maiyalud-od manen ti ECQ tapno maikkan amin ti gundaway a maeksamen.
Kabayatanna, aminado ti senadora nga adda ti pannakaulaw iti listaan dagiti kwalipikado wenno saan a makaawat koma ti Social Amelioration Package”.
Daytoy ket gapu ta awan ti listaan dagiti informal sectors ken mangnamnama latta ti gobierno iti LGU.
Kuna na a ti DSWD ket dagiti laeng miembro ti 4Ps ti adda kadakuada ti listaan na idinto a ti DOLE ket dagiti met laeng addaan ti kontrata wenno maibilanga wage earner ti nakarekord kadakuada.
Innayon na a malaksid iti isyu iti listaan ket agkurkurang pay ti pondo para iti maipaay a tulong pinansyal kadagiti maseknan.
Inyangaw pay ti senadora nga arigna ad-ado pay dagiti makagura ngem dagiti nakaawat ti tulong manipod iti gobierno.
Kabayatanna, inbaga ni Senador Marcos nga ita a panawen ti krisis ket maminpinsan nga ibukbuk ti tulong kadagiti umili ken saan a rumbeng a pilyen ti maikkan gapu ta uray dagiti maibilang nga adda ti mabalin na wenno middle class family ket agkurkurang da met iti kadagitoy a gundaway.
