LAOAG CITY – Inbatad ni Sen. Imee Marcos a saannan a kayat a rubruban ti saan a panagkinnaawatan da Presidente Ferdinand Marcos Jr. ken Vice President Sara Duterte a dati a nasinged nga agkaalyado.
Maipalagip nga iti kallabes ket inadmitir ni Presidente Marcos nga adda ti pannakadismaya na idi nangngeg na nga inbaga ni Vice President Duterte a saan da nga agpagayam gapu ta ti paggaammo na ket nasinged da iti tunggal maysa.
Iti pannakasaludsud ken ni Senador Imee no ania ti komento na iti daytoy ket insungbat na a saanna a kayaten a rubruban ti isyu.
Inlawlawag na nga agpada a napateg kenkuana dagiti dua gapu ta kabsat na ni Presidente Marcos idinto a nasinged a pagayam na ti bise presidente.
Innayon na a kas napudno a kabsat ken pagayam ket saannan a kayat a padakkelen ti isyu ken agtalek a kabaelan da ti agtimek para iti bagbagida.
Mainaig iti daytoy, kuna ni Senador Imee nga ipadpadas na latta a kasarita ti kabsat na tapno balakadan daytoy ngem no dadduma ket marigatan gapu ta agduduma dagiti tattao a nakapalawlaw kenkuana.
Gapu iti daytoy, immapela ti senadora a saan a gundawayan ti sabali ti kinasayaat ti kabsat na a presidente.
