LAOAG CITY -Kinumpirmaran ti Senate Legislative Budget Research and Monitoring Office (LBRMO) nga awan ti opisyal a dokumento wenno rekord a mangipaneknek a ni Senador Jinggoy Estrada ket nangiwayat ti insertions wenno amendments iti 2025 national budget mainaig kadagiti proyekto ti Department of Public Works and Highways (DPWH) idiay Bulacan.
Iti report iti Office of the Ombudsman, inlawlawag ti Senate Legislative Budget Research and Monitoring Office nga amin nga amendments nga inaprubaran ti plenaryo ket maibilang nga aggapo iti Senado kas institusyon ken saan a maikonektar iti maysa a partikular a senador.
Rimuar ti nasao a rakurak iti baet ti Ombudsman mainaig iti maipagarop a kickbacks manipod iti flood control projects, banag a naiget a naglikudan ni Estrada.
Inpetteng ti senador a sipud nangrugi ti kontrobersiyal ket nagtalinaed ti takder na nga awan ti pagibasaran ken natibker nga ebidensiya dagiti akusasyon kontra kenkuana.
Inpetteng na nga inaramid na laeng ti trabaho ken pagrebbengan na kas senador a nangtingiting iti national budget ken nangilungalong kadagiti maamendaran para iti pagsayaatan dagiti umili.
Dinakamat pay ni Estrada a ti report ti Senate Legislative Budget Research and Monitoring Office ket mangipaneknek nga awan ti aniaman nga insertions iti paset ti DPWH budget a mabalin a maikonektar kenkuana.
Innayon ti senador a nakasagana a mangsango ken paglikudan amin ti saan nga umiso nga alegasyon a maibatbato kontra kenkuana.
Iti baet ti kaawan ti opisyal a rekord, agtultuloy paylaeng ti imbestigasyon ti Ombudsman tapno maamoan ti kalawa ti maipagarop nga anomalya ken pagsungsungbatan dagiti karaman iti isyu.
