LAOAG CITY – Ag-inhibit ni Senate Committee on Ethics Chairman JV Ejercito apaman a matalantan ti ethics complaint kontra kenkuana.
Pinilaan ti ethics complaint ni Ejercito gapu iti maipagarup a panangbaybay-a ken saan nga insigida a panangtignay iti reklamo nga inpila kontra ken ni Sen. Chiz Escudero mainaig iti panangawat daytoy ti campaign donations iti maysa a contractor ti gobierno.
Inbatadna nga ag-inhibit daytoy iti kanito a talantanen ti komite ti reklamo kontra kenkuana.
Kunana nga adda ti sumukat kenkuana iti mayorya kabayatan a mataltalantan ti ethics complaint.
Inpetteng ni Ejercito, uray asino kadagiti miembrona a sumangsango iti reklamo ket saan a makipaset iti diskusion ti bukud a kaso.
Inpasingked manen ni Ejercito a suroten ti komite ti proseso ken awan ti complaint nga isingit wenno labsan.
