LAOAG CITY – Inpanawagan ni Senador Pia Cayetano ti pannakaitantan iti panagngato ti matrikula kadagiti kolehio ken unibersidad iti baet ti agtultuloy a panagngato kadagiti gastosen ita a krisis.
Inbatadna a supsuportaranna ti apela ti Commission on Higher Education (CHED) nga itantan pay laeng dagiti amin nga unibersidad ti panagngato iti matrikula gapu ta naruay a pamilia ti marigrigatan iti agtultuloy a panagngato iti presio kadagiti magatgatang ken serbisio.
Kiniddaw ti senadora a nasken a siguradoen a ti edukasion ket agtalinaed nga accessible nangruna kadagiti panawen a sumangsango ti pagilian ti dakkel a pannubok.
Inlawlawagna a ti edukasion ket tulbek iti panagngudo ti kinarigat ken panangipasigurado ti intergenerational equity isu nga inallukoyna nga agtinnulong dagiti pribado a sektor ken ti gobierno a palag-anen ti mapaspasaran dagiti estudiante.
Pagtigtignayen ti agpanpanday linteg dagiti Higher Education Institutions (HEIs) nga agbirok ti alternatibo a wagas iti panangsolbar kadagiti karit iti operasion a saan a parparigaten dagiti estudiante ken ti pamiliada.
