LAOAG CITY – Nailungalong ti House Young Guns ti House Bill No. 10587 wenno West Philippine Sea Education Act tapno mairaman iti kurikulum dagiti pagadalan ti maiyannatop nga edukasion mainaig iti West Philippine Sea.
Gagem ti gakat a suroan dagiti estudiante maipanggep kadagiti karbengan ti Pilipinas iti West Philippine Sea basar iti Konstitusion, Philippine Maritime Zones Act, UNCLOS ken iti 2016 arbitral ruling.
Segun kadagiti author, napateg a maipaayan dagiti agtutubo ti umno ken basar iti ebidensia nga impormasion tapno saan a maallilaw iti saan nga husto nga impormasion ken propaganda.
Manmandaren ti gakat ti Department of Education ken Commission on Higher Education a mangbukel ti learning materials kabinnulig dagiti nagduduma nga ahensia ti gobierno.
Nakailanad pay a ti panangisuro ket nasken nga agtalinaed a saan a partisan, maibasar iti ebidensia ken maiyataday kadagiti opisial a pagannurotan ken international law.
