LAOAG CITY – Ginutigot ni Senate Minority Leader Aquilino “Koko” Pimentel III ni Presidente Ferdinand Marcos Jr. nga ikonsiderar ti pannakibinnulig ti Pilipinas iti International Criminal Court (ICC).
Daytoy ti pannawagan ti Senador iti sangwanan dagiti miyembro ti diplomatic community kabayatan ti maikatlo a Iteration of the Foreign Policy Address iti Department of Foreign Affairs (DFA).
Inpetteng ni Sen. Pimentel a ti panagtinnulong ti Pilipinas iti International Criminal Court (ICC) ket agserbi kas insurance policy kontra kadagiti posible a panag-abuso dagiti lider no saan nga agballigi ti justice system ti pagilyan.
Maipalagip a ni Sen. Pimentel ti mangidadaulo ti imbestigasyon ti Senate Blue Ribbon committee iti kontrobersiyal a war on drugs ti administrasyon ni dati a Pres. Duterte idi Oktubre 28.
Maipalagip pay a nagikkat ti Pilipinas manipud iti International Criminal Court idi administrasyon ni dati a Presidente Rodrigo Duterte kagiddan ti panangipatungpal ti international tribunal idi 2017 nga imbestigaran ti nadara a kampaniya ti Duterte administration kontra iti ilegal a droga.
