LAOAG CITY – Inlungalong ni Sen. Raffy Tulfo iti plenario ti Senado ti Senate Bill No. 2965 wenno ad-adda nga am-ammo iti awag a Free Funeral Services Act.
Mamati ni Tulfo a karebbengan ti tunggal Pilipino a maitabon nga addaan ti dignidad aniaman ti estado iti panagbiagna.
No naan-anay a mapagbalin daytoy a linteg, agbalin a libre ti pannakaitabon dagiti marigrigat a pamilia iti pimmusay a miembro iti pamiliada.
Inbatad ni Tulfo a babaen ti nasao a gakat, mangipakita ti panangrespetar ti human dignity, saan laeng a kabayatan a sibibiag no di ket agingga a matay ti maysa a tao.
Patien ni Tulfo a saanen a nasken nga agbalin a problema dagiti marigrigat ti panangitabon iti pimmusay a kabagianda iti baet ti mapaspasaranda a panagladingit.
Gagem ti gakat nga i-institutionalize ti sistema no sadinno ti accredited funeral establishments iti pannakibinnulig iti Department of Social Welfare and Development (DSWD) ket maipaayan ti libre ken napintas a funeral services kadagiti marigrigat.
Kabayatanna, maikeddeng dagiti “safeguards” kontra iti panangabuso ken panangipasigurado ti patas a reimbursement kadagiti funeral service providers.
