LAOAG CITY – Kiniddaw ni Senador Francis Tolentino iti Department of Health (DOH) nga aramiden amin ti kasapulan tapno mai-update ti publiko maipanggep iti Human Metapneumovirus wenno HMPV iti baet ti panagdanag seknan iti virus ken no kasano daytoy a maiwarwaras.
Inbatad ni Department of Health (DOH) Assistant Secretary Albert Domingo a “fake news” dagiti post iti online maipanggep iti maipagarup a panagwaras ti Human Metapneumovirus idiay China.
Nupay kasta, inlawlawag ni Tolentino a kabayatan nga awan pay ti klaro a rakurak ti World Health Organization (WHO) tapno malawlawagan ti damag a panagwaras ti nasao a virus, nasaysayaat nga agtignay ti Department of Health iti babaen ti panangpapigsa ti panagkampaniada iti pampubliko nga impormasion.
Kunana a nasken nga agaramidda ti addang iti panagan-annad kontra iti aniaman a posible nga outbreak ditoy pagilian.
