LAOAG CITY – Pormalen nga inbilin ti Senado ti pannakatiliw ni dati a Budget Undersecretary Christopher Lloyd Lao, ti officer-in-charge iti Procurement Service of the DBM (PS-DBM) idi gimmatang ti gobierno ti binilyon a balor na a COVID-19 supplies idi 2020.
Daytoy ti kinumpirmaran ni Senate President Vicente Sotto III.
Maipalagip nga iti panagdengeg ti Senate blue ribbon committee idi kalman, ipapa-contempt dagiti agpanpanday linteg ni Lao gapo iti saan na a panagatendar iti sumagmamano nga hearing.
Ni Lao ket naminpat a daras a saan a nagatendar iti panagdengeg ti nasao a komite sipud idi Oktubre 5.
Mainaig iti daytoy, inpetteng ni Senador Richard Gordon, ni Lao ket saanen nga opisyal ti gobierno ken saan a sakop iti mandar ni Presidente Rdorigo Duterte a saan nga agatendar dagiti cabinet members ken empleado iti panagdengeg.
Inpetteng met ni Senate Sergeant-at-Arms retired Major General Rene Samonte nga iserbi da ti arrest order kontra kenni Lao uray awan isuna idiay Metro Manila.
Daytoy ket kalpasan nga inrakurak ni Lao iti napalpalabas nga hearing a nagsubli idiay Davao City kalpasan a nagikkat iti pwesto iti DBM.
Kabayatanna, awan met pay ti komento ni Lao mainaig iti daytoy a banag.
