LAOAG CITY – Indatagen ti Senado ti proposed calendar wenno timetable para iti panawen iti panangtingiting iti impeachment court apaman a mangrugi ti impeachment trial kontra ken ni Vice President Sara Duterte.
Basar iti nairuar a kopya ti impeachment calendar ni Senate President Chiz Escudero para iti panangtingiting iti Bise Presidente iti panagsubli ti sesyon inton Hunio 2, iti oras ti alas tres ti malem ket iprisentar ti prosecutors ti Articles of Impeachment ken aprobaran ti Revised Rules of Procedure ti impeachment trial.
Naammoan nga inton Hunio 3 iti oras ti alas nuebe ti bigat ket ag-convene ti Senado kas impeachment court ken agsapata dagiti incumbent senator judges; Hunio 4 ket mangiyisyu ti summon ken ni Vice Pres. Sara; Hunio 14 agingga Hunio 24 ti panangawat kadagiti pleadings wenno dagiti sungbat ti kampo ni Vice Pres. Sara ken ti prosekusion ken inton Hunio 24 agingga iti Hunio 25 ket naikeddeng para iti pre-trial.
Inton Hulio 28, ti panaglukat ti regular session ti 20th Congress ket State of the Nation Address (SONA) met ni Presidente Ferdinand Bongbong Marcos Jr. ket ditoy sumrek dagiti 12 a baro a Senador.
Inton Hulio 29 ket agsapata dagiti baro a naelektaran a Senador nga agtugaw nga hues iti panangtingiting kageddan ti panangrugi ti impeachment trial iti oras ti alas nuebe ti bigat agingga iti alas dos ti malem idinto a plenary session iti alas tres ti malem.
Target ti impeachment court a rugian inton Hulio 30 ti mismo a trial kontra ken ni Vice Pres. Sara.
Inlawlawag ni Escudero, ginuduada ti oras ti trial ken sesyon tapno maaramidda ti trabahoda kas legislative body ken maipasa dagiti napapateg a linteg nangruna ket manamnama ti pannakatalantan ti national budget.
