LAOAG CITY – Agpila ni Senadora Loren Legarda ti gakat a Bayanihan Power to the People Act wenno Bayanihan 3 Law tapno mangidasar iti nalawlawag ken naurnus asungbat ti gobierno iti kumarkaro nga epekto ti krisis iti langis iti sangalubungan.
Segun ken ni Legarda, nupay addan ti inparuk-at ti gobierno nga Executive Order No. 110 a mangideklarar ti national energy emergency, kurang paylaeng daytoy iti konkreto a tulong para kadagiti umili.
Inpetteng ni Legarda a saan nga umdas ti price control kas napaot a solusyon.
Kuna na a masapol nga adda ti maysa a napagtipon, detalyado, ken epektibo a plano ti gobierno a mangipaay ti proteksyon ken pannakapalag-an ti panagbiag iti baet ti krisis.
Iti babaen ti inlungalong a gakat ni Legarda, maipaayan ti ehekutibo ti nalawlawag a bileg tapno idaulwan ti panangsolbar ti krisis, karaman ti temporary a tax relief measures kas ti possible a VAT exemption it kangrunaan a magatgatang ken serbisyo, emergency revenue measures kas ti nangatngato a buwis iti luxury ken sin goods ken posibilidad ti panangipataw ti wealth tax tapno mapondoan dagiti programa ti gobyerno.
Gagem pay ti gakat a paiyalisto ti pannakaiyakar ti pagilian iti ad-adda a sustainable nga energy sources, karaman ti renewable energy, energy efficiency, ken alternatibo a transportasyon kas ti electric vehicles.
Inpetteng ni Legarda a masapol nga aramiden ti gundaway ti agdama a krisis tapno makisayan ti panagdepende ti pagilian iti imported fuel, ti maysa a nabayagen a problema a nangibutaktak iti Pilipinas iti agbaliw-baliw a presyo iti world market.
Ti draft ti Bayanihan 3 Law ket nakabasar kadagiti naduktalan manipod iti panagdengngeg ti PROTECT Ad Hoc Committee, a gagem na ti mangbukel iti ad-adda nga epektibo a reporma para iti relief, recovery, ken napaot a crisis management.
