LAOAG CITY – Nagpanawagan ni Senate President Francis “Chiz” Escudero a kissayan ti P250.8 billion a pondo para kadagiti flood control projects ti Department of Public Works and Highways (DPWH) manipod iti nailungalong nga P881.3 billion budget na para iti 2026.
Segun ken ni Escudero, masapol nga ilatang ti dakkel a paset ti pondo iti edukasyon, salun-at ken produksyon ti taraon kabayatan nga iyur-uray ti pannakaipatungpal ti Asian Development Bank -funded flood control master plan iti sumaruno a tawen.
Dinillaw met ni Escudero ti ado unay a pondo para iti flood control, a nasursurok pay ngem ti P13 billion para kadagiti baro a classrooms ken P52-bilyon a para iti rangtay.
Ginutigot ni Escudero ti Department of Budget and Management (DBM) a balbaliw a tingitingen a naimbag ti budget ti Department of Public Works and Highways ken limitaran ti flood control projects para kadagiti lugar a pudno a lalayusen.
Kabayatanna, inpetteng dagiti lider ti Kamara de representantes nga isubli ti nailungalong a 2026 national budget iti Department of Budget and Management tapno urnusen ti alokasyon, karaman ti flood control projects.
Nagkari ti Department of Budget and Management (DBM) ken ti Department of Public Works and Highways a rebisaren da ti nailungalong a pondo.
