LAOAG CITY – Mapukpukaw ti maysa a Senior Citizen kalpasan a maipagarup a naiyanod iti karayan iti Brgy. Isic-Isic iti ili ti Vintar.
Segun ken ni Mr. Al Leaño, mangidadaulo ti Municipal Disaster Risk Reduction and Management Council iti ili ti Vintar, nabigbig ti indibidual a ni Nelson Laureta, agtawen 77, naasawaan ken residente ti Brgy. Isic-Isic iti nasao nga ili.
Inbatadna nga agtultuloy ti panangiwayatda ti search and rescue operation kaduada ti Philippine National Police ken Bureau of Fire Protection iti ili ti Vintar.
Mainaig iti daytoy, inlawlawag ni P/Capt. Jofel Pascual, Hepe ti Vintar Municipal Police Station a basar iti inwayatda nga imbestigasion ket mapan koma iyapon ti biktima ti tarakenna a nuang ngem maipagarup a naigalis daytoy a nangitunda ti pannakaiyanodna iti karayan.
Kunana nga insardengda ti panangbirok iti biktima iti oras ti alas dose ti rabii idi kalman gapu ta napigsa ti tudo ken nalibeg ti danom.
Nupay kasta, inpasingkedna nga intuloyda ita nga aldaw ti pannakaisayangkat ti search and rescue operation tapno masarakan ti biktima iti kabiitan a panawen.
