LAOAG CITY – Umabot iti 82 nga umili nga addaan ti pimmusay a kameng ti pamilia da ti kaudian nga inpaayan ti gobierno probinsial babaen ti Office of the Barangay Affairs.
Basar iti datos manipod iti nasao nga opisina, 15 dagiti immawat iti sangapulo ribu a pisos iti tunggal maysa kalpasan nga adda dagiti pimmusay a kameng ti pamilia a naaksidente wenno dadduma pay a saan a napakpakadaan nga insidente.
Kabayatan na, naamoan a dagiti met naipaayan ti tulong a pimmusay dagiti kameng ti pamiliada gapu iti sakit ket umabot iti innem a pulo ket pito (67) ken tunggal maysa ket naipaayan ti lima ribu a pisos.
Kaipapanan daytoy nga agdagup 485,000 a pisos ti kaudian a “burial assistance” nga inpaay ti probinsia kadagiti nagpatulong iti kapitolyo probinsyal.
Mangnamnama ti nasao nga opisina nga uray bassit laeng ti tulong a naipaay kadagiti maseknan ket makatulong a mangalay-ay iti nadagsen a marikrikna da iti ipupusay ti kameng ti pamiliada.
