LAOAG CITY – Nasugatan ti ulo ti maysa a lakay kalpasan a dinungpar ti nakamotorsiklo kabayatan ti panagballasiw na iti kalsada iti Brgy. Guerrero iti ili ti Dingras.
Nabigbig ti lakay a ni Antonio Saladino, agtawen ti 75, ken residente iti nasao a barangay.
Iti pakpakauna nga imbestigasyon ti PNP Dingras, bayat nga agpapaabagatan ti motorsiklo nga Honda TMX 125 black nga inturong ni Manuel Aoalin y Rosqueta, agtawen ti 25, residente iti Brgy. Medina iti nasao nga ili a nakalubbon da Axel James Tadena, agtawen ti 20, ken ti agtawen ti 12 nga ubing ket nadungpar da ti lakay a a bumallasiw iti kalsada nga agpalaud a direksyon.
Gapu iti daytoy, napukawan ti kontrol ti driver iti manibela ti motorsiklo rason a natulid da agraman ti lakay.
Nagsagaba ti lakay ti sugat iti ulo na ken sumagmamano a paset ti bagi na ken dagus nga intaray dagiti otoridad iti Dingras District Hospital ngem naiyakar iti Gov. Roque Ablan Memorial Hospital ditoy ciudad ti Laoag.
Dagus met a nakarwar iti ospital dagiti tallo a nakalugan iti motorsiklo.
Agtultuloy ti imbestigasyon dagiti otoridad mainaig iti nasao a a desgrasya
