LAOAG CITY – Natay ti maysa a senior citizen nga addaan ti mental depression kalpasan a nagbekkel iti Sitio San Isidro iti Barangay 9 Binacag iti ili ti Banna.
Ti biktima ket agtawen ti 72, naasawaan ken residente iti nasao met laeng a barangay.
Basar iti Banna Municipal Police Station, mapan agiwayway ti maysa a residente kadagiti tarakenna idi nakitana ti biktima a nakabitinen ti bagina manipud iti puon ti kayo ti lungboy babaen ti nylon a tali a nakatali iti tengngedna.
Mainaig iti daytoy, inpakaammo ti maseknan a pamilia nga addaan ti depresyon ti biktima kalpasan ti pannakatay ti anakna gapu iti pannakaatakena iti puso idi Enero 29, 2025.
Maibasar iti post mortem examination nga inyuswat ni Dra. Dinelle Laurina Aguilar, Municipal Health Officer a ti nangitunda ti pannakatay ti biktima ket gapu iti Asphyxia Secondary to Strangulation.
Kabayatanna, awan ti pakalasinan ti foul play iti napasamak nga insidente.