LAOAG CITY – Pormal a naisubli iti PNP dagiti service firearms a nagtalinaed iti General Services Office (GSO) iti lokal a gobierno ditoy siudad.
Daytoy ti inpakaammo ni Sannguniang Panlungsod Member Jason Perera nga inaramid dagiti opisyal ditoy siudad ti Laoag pakairamanan ni Mayor Michael Marcos Keon kalpasan ti pannakatratar ti nasao a banag iti sesyon.
Immuna iti daytoy, kwinestyuran ni Perera ti pannakaisubli iti GSO idi 2019 dagiti service firearms iti laksid a naidonar iti PNP idi 2014.
Segun ken ni Perera, adda ti pagsungbatan ti kapulisan iti daytoy gapu ta saanen nga otorisado ti siudad nga agikot iti armas ken nayag a saan a nai-renew dagitoy.
Nu pay kasta, inlawlawag ni PMaj. Carlo Abing, ti deputy chief of police ditoy siudad a basar iti rekord, adda ti 12 a shotgun ti naisubli iti General Services Office para iti inventory.
Mainaig iti daytoy, inpakaammo ni Ret. General Nestor Pedro, ti mangidadaulo ti Civil Security Unit a dagiti nasao a service firearms ket saan a pulos a nausar ken saan a naited kadagiti miembro gapu ta awan ti ELTOP dagitoy.
Kabayatanna, inbatad ni Perera a manamnama nga adda ti maiyalokar a pondo para iti pannakagatang ti service firearms dagiti miembro ti CSU.
Innayun na a masapol met a maarisit a naimbag dagiti rumbeng nga agbalin a miembro ti CSU ken dumalan dagitoy iti panagensayo seknan iti panagikot ti service firearms.
