LAOAG CITY – Saanen nga agop-operar ti Seven Colors Cooperative ngem adda ti baro a nairehistro a kooperatiba.
Daytoy ti kinumpirmaran ni Sang. Panlalawigan Member Domingo Ambrocio, Chairman ti Committee on Agriculture iti gobierno probinsyal.
Segun kenni Ambrocio, idi May 27, 2020 ket naaprubaran ti Seven Colors Marketing Cooperative babaen iti Cooperative and Development Authority ken idi pay Hulyo 1 ita met laeng a tawen ket saanen nga agop-operar ti dati a koperatiba.
Inbatad na a ti nangirehistro ti baro a kooperatiba iti CBA jet maysa met laeng a miembro ti Seven Colors Cooperative.
Saan met a maibaga ti bokal no dagiti opisyales iti dati a kooperatiba ket isuda met laeng ti opisyales iti baro.
Gapo iti daytoy, kuna ni Ambrocio a nagsurat da iti CBA tapno makikoordenar ken tumulong kadakuada tapno malawlawagan ti sitwasyon kasta metten a matulungan dagiti residente iti Barangay Caroan iti ili ti Pasuquin.
Mainaig iti daytoy, inlawlawag ti bokal a masapol nga adda ti maisayangkat a sabali pay a committee hearing iti biang ti Committee on Laws, Committee on Agriculture ken Committee on Environment.
Maipalagip a nagbalin a kontrobersya ti nasao a banag kalpasan ti panakkadesgrasya ti maysa a behikulo iti paset ti ili ti San Nicolas a nagikarga ti pebbles ngem sabali ti nakaisurat iti tarpaulin.
