LAOAG CITY – Naipatungpal ti shellfish ban ti Bureau of Fisheries and Aquatic Resources (BFAR) iti kabaybayan ti Daram, Samar kalpasan a nakumpirmaran ti presensia ti makasabidong a red tide iti babaen ti laboratory test.
Basar iti abiso ti Bureau of Fisheries and Aquatic Resources, maipawil ti panagala, panaglako ken taraon ti aniaman a klase ti shellfish pakairamanan ti babassit nga udang iti naapektaran a lugar.
Nakailanad iti report a positibo iti red tide toxins ti seawater samples iti Daram isu nga inraman daytoy iti national shellfish bulletin pakairamanan ti dadduma pay a naapektaran a kabaybayan iti pagilian.
Immunan a nangipatungpal ti kapada a panangipawil iti Matarinao Bay a sakupen kadagiti ili ti General MacArthur, Quinapondan, Hernani ken Salcedo iti Eastern Samar kalpasan a nagpositibo iti red tide ti shellfish ken seawater samples.
