LAOAG CITY – Inbatad ni Barangay Chairman Elviro Agoo iti Barangay Davila iti ili ti Pasuquin a manarimaan ti panagpapirma da ti inaramid da a Signature Campaign kontra iti Ilocos Norte Electric Cooperative (INEC).
Daytoy ket gapu iti nangato unay a singir iti kuryente a maysa a kangrunaan a padagsen kadagiti member-consumers iti nasao a kooperatiba.
Mamati ni Agoo a 99.9% nga agpirma amin a kabarangayan na.
Inpetteng na a kalpasan ti panagpapirma da iti daytoy ket isumitir da iti opisina ni Congressman Sandro Marcos, Sang Bayan, gobierno probinsyal ken uray iti senado para iti nan-anay a pannakaiyuswat ti imbestigasyon.
Innayon na a possible nga addan to pay dagiti dadduma a barangay ken ili a tumulad iti isaysayangkat da a signature campaign.
