LAOAG CITY – Nasakit ti nakem dagiti residente iti Barangay Angset iti ili ti Carasi gapu kadagiti sinako a basura a naibelleng iti ayan ti potable water da a paggapwan ti in-inumen da.
Daytoy ti inbatad ni Barangay Chairman Edwin Sueb iti Barangay Angset iti ili ti Carasi.
Inlawlawag ti kapitan a napalalo ti luksaw da kalpasan a nakita da dagiti nakaad- ado a basura iti ayan ti potable water ti barangay da.
Inbaga na nga a karaman kadagiti naibasura iti lugar ket sumagmamano a surat ken resibo ti nagawatan ti kwarta no sadinno a nakita da ditoy ti nagan dagiti nakaiturungan dagiti surat nga isu ti pinatuludan da ti summon babaen iti PNP-Carasi.
Inbatad ti kapitan nga agsasarita da koma idi kalman kadagiti napatuludan ti summon a taga Barangayan Tanggaoan iti ili ti Piddig ngem saan a napan nagparang dagiti maseknan.
Nupay kasta, mangnamnama ti kapitan nga iti sumaruno a panangpaawag da kadagiti maseknan ket makapagsasango danton tapno maamoan no siasinno dagiti napan nagibelleng ti basura iti barangay da.
