LAOAG CITY – Kinumpirmaran ni Barangay Chairman Dionisio Guillermo Jr., iti Barangay 6 ditoy ciudad ti Laoag a kabarangayan da ti baro a nagpositibo ti covid-19 ditoy probinsya.
Daytoy ket ni IN-C73 nga agtawen ti 38 a lalaki, Customer Service Representative ken kaubraan na ti immunan a nagpositibo ti covid-19 a taga Barangay 40, Balatong ditoy ciudad ti Laoag.
Inbaga na nga iti agdama ket manarimaan ti contact tracing da kadagiti possible a nakapulapol ti kabarangayan da a positibo ti covid-19.
Inpakammo ni Guillermo nga umabot iti 10 dagiti possible a maipadalan ti swab test a maipagarop a nakapulapol ni IN-C73.
Innayon na a binalakadan da dagiti maseknan a residente a saan da pay laeng a rumrumuar isut gapuna a naiget ti panagbanbantay da iti agdama iti barangay da.
Iti agdama, ti pasyente ket adda iti Mariano Marcos Memorial Hospital and Medical Center iti ciudad ti Batac.
Kabayatanna, pinirmaan metten ni Mayor Michael Marcos-Keon ti Executive Order No. MMK-035-2020 a mangidekdeklarar ti pannakailockdown ti Sitio 7 iti Barangay 6 ditoy ciudad ti Laoag.
Immuna iti daytoy, kinataripnong ti mayor da Barangay Chairman Guillermo, Barangay Kagawad Wilfredo Santos, Barangay Secretary Percival Justo, pakairamanan da City Administrator Atty. Roxanne Lee Castro, Atty. Franklin Calumag iti City Legal Office, Police Lt. Col. Rafael Lero a chief of police ditoy ciudad ti Laoag ken ni CSWD Officer Perlita Cabello mainaig iti kaadda ti nagpositibo ti covid-19 iti Barangay 6 ditoy ciudad.
