LAOAG CITY – Umabot ti siyam a lugan ti naimpound iti PNP iti ili ti Marcos gapu iti illegal a panagisaysayangkat da ti panagquarry iti paset ti Barangay Escoda iti nasao nga ili.
Daytoy ti kinumpirmaran ni Police Lt. Belen Baoit, OIC iti PNP iti ili ti Marcos.
Segun ken ni Baoit, karaman kadagiti naimpound da a lugan ket dua a 10-wheeler truck 3 backhoe, tallo a transit mixer ken maysa a payloader.
Inbatad ni Baoit a basar iti panagimbestigar da, ti agtagikua kadagiti nasao a lugan ket ti Remigio General Construction a kukua ni Efren Remigio.
Innayon na nga awan ti naipakita a permit dagiti maseknan mainaig iti panagisaysayangkat da ti panagquarry isut gapuna nga inikkan da daytoy ti citation ticket ken in-impound da dagiti us-usaren da a lugan.
Kabayatanna, inpakaammo ni Baoit nga agtalinaed dagit lugan iti kwerpo ti pulisya agingga a saan a maurnus ni Remigio dagiti nasken nga urnusen na iti Provincial Quarry Office.
