LAOAG CITY – Maragsakan ni Mr. George Cabantangan, SK Chairman ti Barangay 7 iti ili ti Sarrat iti panangpirma ni Presidente Rodrigo Duterte ti Republic Act 11768, a mangamendar iti Sangguniang Kabataan Reform Act of 2015.
Segun kenni Cabantangan, nabayag nga inur-uray da daytoy sipud pay idi nagtugaw da idi 2018.
Inbatad na nga ammo met ti kaadoan a narigat para kadakuada ti agipasa dagiti dadduma a trabaho no awan ti tulong dagiti SK Kagawad.
Inlawlawag na a nasken laeng nga adda ti maited kadagiti SK Kagawad nangruna ket agtrabaho da para iti barangay da.
Kunana a narigat met nga amin a panagtrabaho ket libre nangruna ket naaelektaran met dagiti SK Kagawad ken kasapulan met ti kwarta.
Inadmitir na nga idi naamoan na daytoy a napintas a damag ket nakigtot gapo ta saan na a ninamnama nga ita a mapagbalin a linteg daytoy.
Gapo iti daytoy, naragsak da gapo ta iti laksid a dandanin ti panaglippas ti termino ni Presidente Duterte ket naipaay kadagiti agtutubo ti nabayagen nga ur-urayen da a maikkan ti prebilihiyo ken ti kaadda ti honorarium da.
Mainaig iti daytoy, patien ni Canbantangan a no saan a naipasa ti nasao a linteg ket mabalin a bassit ti agkalikagom nga agbalin nga SK officials.
