LAOAG CITY – Inpalagip ti Department of Justice kadagiti pagadalan ti responsibilidad wenno obligasyon da nga aywanan ken salwadan dagiti estudyante.
Segun ken ni Justice Secretary Atty. Fredderick Vida, saan a rumbeng a malipatan dagiti institusyon wenno pagadalan ti obligasyon da aglalo kadagiti estudyante nga intalek dagiti nagannak.
Kuna na nga adda ti maaw-awagan ti ‘substitute parental authority’ iti oras nga adda iti uneg ti pagadalan dagiti estudyante nga isu met ti agbalin a responsibilidad ti nasao nga unibersidad.
Inpetteng ti sekretaryo a sakopen ti obligasyon ti pagadalan ti curricular wenno non-curricilar activities iti pages-eskwelaan da.
Gapu iti daytoy, inrakurak ni Justice Secretary Vida nga im-imbestigaren dan ti pagsungsungbatan ti unibersidad iti pannakatay da Rene Baterbonia ken Divin Adili, agpada a player ti Ateneo Blue Eagles basketball team.
Adalen a naimbag dagiti imbestigador saan laeng a ti pagsungsungbatan ti coach ti team no di ket karaman pay ti unibersidad ken dadduma pay a responsable.
Uray iti panagpili iti lugar no sadinno a naisayangkat ti aktibidad a nagtungpal ti pannakatayti dua nga atleta ket karaman kadagiti maim-imbestigar tapno maamoan no adda ti panagbaybay-ay ken panagkurang.
Nupay kasta, siguradwen ti Department of Justice a saan da a baybay-an ti kaso ken maibasar iti imbestigasyon kadagiti maukkon nga ebidensya.
