LAOAG CITY – Dinepensaan ni South Korean President Yoon Suk Yeol ti martial law decree-na iti panagparangna manen iti publiko.
Iti maysa panagbitla na, kinuna ni Yoon nga awan ti panggepna a mangdadael iti kinaurnos ti konstitusion idi indeklarana ti martial law idi Disiembre 3 ken nangibaon iti ginasgasut a tropa iti National Assembly.
Kunana nga inaramidna daytoy tapno maisalakan ti pagilianda manipud kadagiti inawaganna a ““anti-state” a partido ti oposision, gapu ta patien na nga inusarda laeng ti Assembly tapno mapilayan ti pagilianda.
Innayon pay ni Yoon a ti nagbalin nga addangna ket paset ti konstitusional a pannakabalinna kas Presidente ken saan a mangipakita iti insurrection.
Gapu iti daytoy, inpetteng ni Yoon a makilaban agingga ti panagngudo ti termino na.
Kabayatanna, maipalagip a sinuportaran ti ruling party a People Power, ti impeachment kontra ken Yoon.
