LAOAG CITY – Pormalen a binigbig ti Spain, Ireland ken Norway ti Palestinian state tapno matutukan da nga ibirukan ti political solution ti mapaspasamak a gubat iti Middle East.
Mangnamnama dagiti nadakamat a pagilian a babaen ti panagtignay da a sangsangkamaysa ket maallukoy da pay dagiti dadduma a pagilian ti Europa a mangsurot kadakuada a mangitantudo ti pannakaipatungpal ti ceasefire idiay Gaza ken mawaya-wayaan dagiti nabatbati pay nga hostages ti Hamas.
Ti symbolic decision ket nangitunda ti nakaro a pungtot ti gobierno ti Israel kadagiti tallo a pagilian nga ibilang na a manggunguna iti terorismo.
Immunan nga inikkat ti Israel dagiti ambassador na iti Ireland, Norway ken Spain, kagiddan ti panangbabalaw na kadagiti pannakabagida iti Tel Aviv.
Basar pay iti report, ti panangbigbig dagiti tallo a pagilian ti Palestinian State ket nangdegdeg ti diplomatic pressure iti Israel kalpasan nga adda ti dua nga international courts a nagpanawagan nga isardengen ti Israel Defense Forces (IDF) ti operasyon da iti southern Gaza ken inakusaran da ni Prime Minister Benjamin Netanyahu ti war crimes.
