LAOAG CITY – Maiyakar iti paperless system ken agusar ti blockchain technology ti kamara de representantes mangrugi intono 2026.
Daytoy ti inrakurak ni House Speaker Faustino “Bojie” Dy III, no sadinno a kuna na a ti gagem ti nasao nga addang a papigsaen ti transparency, seguridad, ken integridad dagiti proseso iti Kongreso, karaman ti panagsagsagana ken panagiproseso ti national budget.
Inbatad na a no maipatungpal daytoy, ti Pilipinas ti agbalin a kaunaan a legislative body iti Asya nga agusar iti nasao a teknolohiya.
Isayangkat ti inisyatiba iti tulong ti Department of Information and Communications Technology.
Segun ken ni Speaker Dy, ti panagtalek ti umili iti gobierno ket saan a mabukel iti sarita laeng no di ket iti babaen ti kongreto nga addang.
Innayon na a paset daytoy ti ad-adda a napalawa a programa ti reporma ken modernisasyon ti kongreso.
