LAOAG CITY – Posible a saanen a maaddaan ti special elections tapno malitupan ti mabakantean a posision ni Senador ken incoming Department of Education Sec. Sonny Angara.
Mamati ni Commission on Elections Chairman George Garcia nga ababan ti panawen idinto ti termino dagiti 12 nga agdama a nakatugaw kas senador ken agngudon inton 2025.
Inbatadna a posible a saanen a kiddawen ti Senado a mangiyuswat pay ti special elections ken iyuray laengen ti 2025 midterm elections.
Inlawlawag ni Garcia, agingga a saan nga ikagumaan ti Senado a maaddaan ti special elections, agtalinaed a bakante ti posision nga ibati ni Angara.
Dinakamat ni Garcia a kasapulan ti dakkel a pundo tapno maaddaan laeng ti special elections.
Kunana a mabalin a dumanon iti P13 billion ti mausar a pundo tapno laeng litupan ti mabakantean a senatorial seat idinto a masapol met nga agbutos manen dagiti Overseas Filipino Workers.
Idi kalman, Hulio 2 ket inrakurak ti Presidential Communications Operations Office a ni Angara ti mangsukat ken ni outgoing Education Secretary ken Vice President Sara Duterte.
Daytoy ket kagiddan ti panangipasa ti Bise Presidente ti resignation-na banag a dagus met nga inawat ni Presidente Ferdinand Marcos Jr.
Agbalin nga epektibo inton Hulio 19 ti panagbaba ni Vice President Sara kas sekretario ti Department of Education.
