LAOAG CITY – Naibabawi ti pannakaited ti special franchise iti pamilia ni Mr. Nash Dela Cruz a residente ti Brgy. Caaoacan ditoy siudad ti Laoag ken atleta a pimmusay kabayatan ti pannaka-enhanced daytoy iti maysa a pribado nga unibersidad ditoy siudad.
Segun ken ni Sangguniang Panlungsod Member Bryan Alcid, Chairman ti Committee on Transportation, saanda nga intuloy ti panangipaayda ti special franchise gapu ta adda ti malabsingda iti naiyatnag a franchise ordinance.
Inbatadna a nasaysayaat no agaplikarda laengen ken suruten dagiti maiyannatop ken umiso a proseso tapno awan ti masalungasingda iti maipatpatungpal a pagannurutan.
Inlawlawagna a napintas no mabunot ti naganda ngem no saan ket awan ti maaramidanda gapu ta posible a makaaramidda iti maikanniwas iti paglintegan.
Mainaig iti daytoy, kuna ni Konsehal Alcid a kalikagumda nga ipaayan ti special franchise ti maseknan a pamilia gapu ta naipadanon kadakuada a ti anakda nga atleta a pimmusay ket maibilang a bread winner.
Kabayatanna, inpalgakna a gapu iti daytoy ket inbabawi ti Sangguniang Panlungsod ti inlungalongda nga ordinansa apaman a naammirisda a maikanniwas ti pagalagadan.
