LAOAG CITY – Inbatad ni Atty. Donato Balderas, Schools Division Superintendent iti Department of Education ditoy probinsya a mabalin nga ukagen dagiti mangisursuro ti bag dagiti estudyante tapno makita no ania dagiti naglaon ken masigurado nga awan dagiti makadangran a banag.
Nupay kasta, kuna na a no ukagen ti maysa a mangisursuro ti bag dagiti adalan na ket masapol nga adda metlaeng dagiti mangimatang a pada na a mangisursuro wenno dagiti agpapaay iti pagadalan.
Rakurak daytoy ni Balderas kalpasan a nasaludsud kenkuana maipanggep dagiti ar-aramiden da nga addang tapno maliklikan dagiti saan a nasayaat a pasamak iti uneg ti pagadalan, kalpasan ti pammaltog iti Ateneo de Zamboanga University a nakatayan ti dua nga estudyante no sadinno a maysa kadakuada ti suspek wenno gunman.
Kuna ni Atty. Balderas, adda ti special parental authority dagiti mangisursuro iti babaen ti family code, no sadinno nga iti uneg ti pagadalan ket isuda iti agserserbi a nagannak dagiti estudyante da isut gapuna a no adda man ti saan a nasayaat a maaramid dagiti ubbing ket isuda ti akin-responsibilidad.
Mainaig iti daytoy, inpakaammo ni Balderas a sakbay pay ti nakaam-ames a pasamak iti pagadalan idiay Zamboanga City ket nakisaritan iti Provincial Director ti Philippine National Police ditoy probinsya tapno mangipatulod kadagiti kameng ti pulisya a mapan mang-lecture kadagiti amin a pagadalan iti Ilocos Norte maipanggep kadagiti rumbeng nga aramiden no bilang adda ti mapasamak a pammaltog.
Innayon na a kalpasan ti pammaltog iti maysa a pagadalan iti met ciudad ti Tacloban ket nagkiddaw kadagiti amin a local chief executives ditoy probinsya ti metal detectors a maipaay kadagiti pagadalan, banag a pinatgan met a dagus dagiti maseknan.
Gagem dagiti naibunong a metal detectors ket tapno al-alisto a maamoan no adda ti banag a karga ti maysa nga estudyante a saan a rumbeng a maiserrek iti pagadalan.
Kabayatanna, inbalakad met ni Balderas kadagiti nagannak nga adda ti ik-ikutan na a paltog a masapol nga ikabil da iti volt nga isuda laeng ti makaammo ti numero na tapno masigurado a saan a maala dagiti annak.
