LAOAG CITY – Inbinsa-binsa ni Sangguniang Panlungsod Member ken Atty. Jason Perera dagiti rason iti lungalong na a pannakaisubli ti operasyon ti cockpit arena iti Brgy. 1 ditoy siudad ti Laoag.
Iti eklusibo nga innuman ti Bombo Radyo Laoag ken ni Atty. Perera, kuna na a kangrunaan a rason a maisubli ti operasyon ti cockpit ket ti panagkasapulan ti pondo a mausar para iti nagduduma a proyekto ken programa ti gobierno.
Inbatad na nga imbes a mapan iti amusement tax kadagiti sabali nga ili ket mabalin a sumrek lattan ditoy siudad.
Inbunannag na a ti cockpit operation ket paset ti turismo basar iti PD 1602 ken iti kultura dagiti Pilipino.
Innayun na a ti kapatgan a rason ket tapno maisubli ti pagsapulan dagiti adda ti pakainaigan na iti operasyon ti cockpit.
Mainaig iti daytoy, inlawlawag ni Atty. Perera a nu maipanggep ti zoning ordinance a 100 a metro ti masapol a kaadayo ti arena manipod iti aniaman nga establisyimento ket mabalin a saan a masurot daytoy gapu ta maibasar iti desisyon ti konseho.
Nu pay kasta, inbatad na a masapol nga adalen paylaeng a naimbag daytoy ti konseho.
Immunan nga inpakamamo ti opisyal a nu maipalubos ti panagsubli ti operasyon ti cockpit arena ket posible nga adda ti mapastrek a maysa a milyon a pisos.
