LAOAG CITY – Inlungalong ni Sangguniang Panlungsod Member Handy Lao, Chairman ti Committee on Tourism ditoy siudad ti Laoag ti pannakaipaay ti lima a porsiento a diskuento iti buis kadagiti hotel ken accommodations.
Segun kenkuana, daytoy ket no mangipaayda ti datos iti tinawen no mano ti agturturong a turista iti imatmatonanda a pasdek.
Inbatadna a nasaysayaat nga ipaayan dagitoy ti insentibo imbes nga ipatawanda ti pannusa tapno ad-adda a magutigotda a makikooperar kadakuada.
Nupay kasta, nai-defer pay laeng ti nasao nga ordinansa gapu ta kalikagum dagiti sumagmamano a Konsehal nga adda ti mainayon para iti pannakapapintas daytoy.
Inlawlawagna a napanunutanna ti nasao nga addang tapno mapapintas ken mapasayaat pay ti pannakaitandudo iti benneg ti turismo ditoy siudad ti Laoag.
Mainaig iti daytoy, inpakaammo ni Konsehal Lao a nakikoordinarda iti City Treasury Office no mano a porsiento ti kapintasan a maipaay kadagiti maseknan nga agtagikua kadagiti hotel ken accommodations.
Innayonna nga adda pay ti posibilidadna a mabalbaliwan daytoy gapu ta nakadepende no ania ti agbalin a resulta iti mapagnunumoanda iti konseho.
