LAOAG CITY – Indeklarar ni Presidente Ferdinand Marcos Jr. ti state of calamity iti Eastern Visayas gapu iti problema iti San Juanico Bridge.
Segun iti Presidente a ti nasao a pannakaideklarar ket basar metten iti rekomendasion ti National Disaster Risk Reduction and Management Council (NDRRMC).
Agbalin nga epekto iti uneg ti maysa a tawen ti state of calamity tapno masolbar ti epekto ti pannakapasayaat ti San Juanico Bridge manipud kadagiti residente ti Samar ken Leyte.
Nakailanad iti proklamasion 920 a ti State of Calamity ket maysa a wagas tapno mausar ti pundo ti local government units ken national government ti pundo para iti pannakapasayaat ti nasao a rangtay.
Inbilin ti Presidente ti Department of Public Works and Highways a makikoordinar kadagiti local government units nga agbiruk ti wagas para iti pannakapasayaat ti nadakamat a rangtay.
Nasken a tulungan met ti Department of Budget Management ti Department of Public Works and Highways a makabiruk ti umdas a pundo para iti pannakapasayaat ti rangtay.
Ti 2.16 kilometers a San Juanico Bridge ket agserserbi a kakaisuna a permanente a mamagkamang iti isla ti Samar ken Leyte pakairamanan ti mamagkamang kadagiti sumagmamano a lugar iti Luzon, Visayas ken Mindanao.
