LAOAG CITY – Naideklara ti State of Calamity iti intero a probinsia ti Ilocos Norte babaen iti naipasa a Provincial Resolution No. 341-2024 gapu iti Bagyo Julian.
Ti nasao a bagyo ket nangitunda ti napigsa a tudo ken angin, nakaro a layos, pannakadadael iti benneg ti agrikultura ken dadduma pay.
Basar iti kaudian a datos nga inparuk-at ti Provincial Government of Ilocos Norte, nasurok 85 a milyon a pisos ti balor ti nadadael kadagiti kapagayan idinto a dumanon iti 385 a ribu a pisos iti benneg ti livestock and poultry.
Naammoan nga adda ti dua a pimmusay kabayatan iti iduduprak ti Bagyo Julian ditoy probinsia kangrunaanna iti siudad ti Batac ken iti ili ti Pasuquin idinto nga adda ti maysa nga indibidual a nairekord a mapukpukaw iti ili ti Paoay.
Mainaig iti daytoy, inrakurak ni P/Maj. Sheryll Guzman, pannakangiwat ti Ilocos Norte Police Provincial Office nga adda ti sumurok-kumurang 400 a police personnel ti nai-deploy kadagiti nagduduma nga ili ken siudad ditoy probinsia gapu iti epekto ti Bagyo Julian.
Kabayatanna, adda ti 378 police personnel ken 140 nga standby personnel iti agtultuloy a pannakaisayangkat ti rescue and relief operations.
