LAOAG CITY – Natiliw ti maysa nga STL collector iti naiyuswat a drug buy bust operation babaen ti nagkakadwa a pwersa ti PDEA, RIB, PRO-1 ken PDEU iti Barangay 21 ditoy ciudad ti Laoag.
Nabigbig daytoy a ni Edmund Aquino alyas Dungkit, agtawen ti 38, ken residente iti nasao a barangay.
Nagatang ti police pusuer buyer kenni Aquino ti maysa a sachet ti maipagarop a marijuana nga agbalor ti 500 a pisos.
Narekobre pay iti ikot ni Aquino a dua pay a sachet ti maipagarop met laeng a shabu, sling bag, maysa a disposable lighter, maysa a wallet, maysa a cellphone ken kwarta a 322 a pisos.
Mainaig iti daytoy, inadmitir ni Aquino nga agus-usar ti iligal a droga ngem inpetteng na nga awan ti ikot na a maipagarop a shabu.
Inbatad na a ti naudi a panagusar na ket idi laeng Setyembre 1 ita a tawen ken awan ti itugtugot na no diket ibatbati na amin iti pagtaengan na.
Naamoan a ni Aquino ket datin a nakunbiktaran mainaig met laeng iti iligal a droga ngem nalpasen ti sentensya na nga 4 a tawen ken 11 a bulan ken nakarwar iti pagbalodan idi Disyembre itay napan a tawen.
