LAOAG CITY – Kalikagom ni Barangay Kagawad Joana Mattias ken maysa kadagiti backyard hog raiser iti Baragay Dibua North ditoy ciudad ti Laoag a maipangato iti 190-200 a pisos iti kada kilo ti live weight manipud iti agdama a 160-165 a pisos iti kada kilo.
Segun kenni Mattias, daytoy ket tapno maabrot da ti gastos da iti panagtaraken nangruna ket nangina ti presyo ti feeds iti agdama.
Inbatad na a ti mangikeddeng iti presyo ti kada kilo ti live weight ket dagiti met laeng aggatang a taga ditoy ciudad ti Laoag nga isu ti parikot da.
Kunana a saan met nga agbaliw ti presyo ti karne ti baboy isut gapo na a maingato kuma met ti paggatang da.
Mainaig iti daytoy, kuna pay a napintas kuma no mapaayaban da met no mapagsasaritaan ti presyo ti live weight tapno mailawlawag da ti arungaing da.
Kabayatanna, inlawlawag ni Dr. Loida Valenzuela, ti Provincial Veterinarian a saan da a kontrol ti presyo ti baboy ditoy probinsya.
Segun kenni Valenzuela, ti masansan a mangmanmanipular iti presyo ti karne ket iti biang a mismo dagiti aglaklako ti karne.
Kuna na a ti problema ti panagbaba ti presyo ti kada kilo ti live weight ket saan laeng a ditoy probinsya no diket iti intero a pagilyan.
Inpetteng na a binulan ti panangammo na ti presyo ti karne ti baboy ken karne ken nakita da nga uray bumaba ti presyo ti live weight ket saan met a bumaba ti presyo ti lako da.
Kageddan iti daytoy ket binalakadan na dagiti hog raisers nga iprograma da ti panagtaraken da tapno no aglako dagitoy ket maipatang iti panagngato ti presyo kas iti Oktubre agingga iti Disyembre.
Malaksid iti daytoy, kunana a masapol a makitinnulong dagiti hog raisers babaen iti panangmonitor da met ti presyo iti sabali a probinsya tapno agtinnunos dagitoy ken iti gobierno.
