LAOAG CITY – Inpakaammo ni Mayor James Bryan Alcid nga adda ti rekomendasion dagiti sumagmamano a department heads kabayatan ti panagtataripnong para iti Annual Investment Progam Plan ditoy siudad ti Laoag.
Inbatad ti Mayor a malaksid iti pannakaaramid dagiti plano para iti 2027 ket adda ti dua a nagbalin a rekomendasionda.
Kunana a ti umuna ket ti pannakaaramid ti plantillia position gapu ta adu dagiti empleado a nabayagen iti serbisio ngem agingga ita ket naka-Contract of Service-da pay laeng.
Malaksid iti daytoy, kasapulan ti pannakagatang dagiti lugan gapu ta daan dagitoyen tapno adda usaren dagiti tunggal departamento.
Innayon ti Mayor a nasayaat gapu ta nairekomendar dagitoy tapno maikkan solusion ken makita ti pagsayaatan iti tunggal maysa.
