LAOAG CITY – Sumagmamano a grupo ti nangipatungpal ti tignay-protesta iti sentro ditoy ciudad ti Laoag kagiddan iti maika-53 nga anibersaryo ti martial law.
Maisayangkat koma ti rally iti Aurora Park ditoy ciudad ti Laoag ngem adda dagiti nagduduma nga aktibidad ti llocos Norte Police Provincial Office.
Gapu iti daytoy, nagdesisyon dagiti protesters nga iti laengen sango ti kapitolyo probinsyal ti pagtalinaedan da.
Immuna iti daytoy, nagmartsa dagiti protesters iti sentro ditoy ciudad no sadinno a kabayatan ti pannagna da ket nakaiggem da ti placard a nakaipalaonan dagiti kalikagom da nga ipatungpal ti gobierno.
Karaman ditoyen ti panagsungbat ken pannakaibalud dagiti kurakot nga opisyal ti gobierno; isyu seknan iti mapaspasamak a layos; presyo ti tabako ken dadduma pay.
Mainaig iti daytoy, naiget ti panagbantay dagiti kameng ti Philippine National Police iti naisayangkat a tignay-protesta ditoy ciudad ti Laoag tapno masigurado ti kinatalged ken seguridad iti tunggal maysa.
