LAOAG CITY – Inpakaammo ni Mr. Danver Dela Cruz, Presidente ti San Marcelino Irrigators Association a posible a saanen nga agmula ti sumagmamano a mannalon ditoy probinsia gapu iti kinangina ti presio ti diesel gubuay iti tension idiay Middle East.
Segun kenkuana, dakkel ti epektona daytoy kadakuada a mannalon nangruna ket kaadoan kadagiti us-usarenda iti panagtalon ken panagpadanum ket makinaria isut gapuna a kasapulanda ti diesel.
Inbatadna a maapektaran ti biruk ken marigatan ti panagsaganada gapu iti panagngato ti presio dagiti produkto a petrolyo.
Iti baet daytoy, inlawlawag ni Dela Cruz nga adda met ti maaw-awatda a tulong manipud iti gobierno kas ti fuel subsidy, lima a ribu a pisos iti kada ektaria, abono ken dadduma pay.
Kabayatanna, kiniddawna nga ipangato dagiti maaw-awatda a subsidiya gapu ta kurang daytoy para kadakuada a mannalon ken isapsapa ti pannakaipaay ti ayuda.
